- قلبه
- عايز أتكلم معاك جد شوية
- جد ولا جدة هوهوهو
- لا ظريف يلا
- طبعًا
- اتكلم ولا أروح أشوف ورايا إيه؟
- وتروح تشوف ليه؟ ما الحيطة وراك اهِه
- الحيطة دي هخبط راسك فيها إن شاء الله
- خلاص يا مودي، احكي يا حُب
- مودي؟ وحُب؟!
- إيه حرام أدلعك يا بيبي؟
- احم... أنا هروح أشوف ورايا إيه أحسن
ضحك - تعالي يابني قولي عايز تقول إيه
- بص عايز الحقيقة ولا ابن عمها؟
- هو ده سؤال؟ ابن عمها طبعًا هههه يابني خلص قول
- ماهو أنا حاسس إني عايز أقولك حاجه بس مش لاقي حاجه أقولها
- عايز تتكلم معايا وخلاص يعني؟
- آه
- قولي بتعمل الأيس كوفي الجامد ده إزاي
- لا، ده سر مستحيل أقولهولك
- ماهو ده العشم بردو
- فاضي شوية؟
- أيوه ليه؟
- نشرب قهوة في حتة بعيدة... إعزمني على نُكتة جديدة وخلي حساب الضحكة عليااا
في نفسه - آه، إنتَ بتردلي يوم ما كنت بكلمك بالأغاني يعني
- عايز تسمع نكتة يا أحمد؟
- ياريت
- مرة واحد حفر حفرة لأخيه وفي الآخر ادحرج فيه هاهاها
- ها فاضي شوية؟
- مش قادر أخرج والله يا أحمد، وبردو عندي شُغل
- عارفك مشغول الأيام دي ... ما أنا زيك بس عندي ... حكايات صعب أخبييها
- ما أنا عارف إنك عايز تحكي، بس مستنيك تيجي تقولي
- وكمنك داري بحالي ... مذاكرني وعارف مالي ... مستني عشان أحكيهااا
- قوم يا أحمد نروح الكافية اللي عند الجامعة اللي كنا فيها
- بس ده بعيد أوي عن هنا!
بابتسامة - وده المطلوب
________••_____••________
- تشربوا إيه؟
- اتنين قهوة سادة
- تمام يا فندم
- قول بقى يا أحمد عايز تتكلم في إيه
- في كل حاجه... عايز أتكلم في كل حاجه
- وأنا سامعك
- ليه يا عمر معُدناش بنلاقي أصحاب حلوين؟
- وأنا مُشوه قدامك مثلًا!
- لأ مقصدش، قصدي اصحاب جدعان
- لا والله! وأنا كيس جوافة قاعد قدامك لا سمح الله!
- يوووه مقصدكش يا عمر
- اهاا اهاا اعتبرني صدقت
- يوووه يا عمر متبقاش قموص كده! أنا قصدي بشكل عام ليه معدناش بنلاقي أصحاب كويسين؟ ليه بيبقى معاك صاحب بتحبه ويحبك ومرة واحده تبعدوا وتفترقوا وعلاقتكم بتبقى شبه منقطعة بالرغم مِن إن محدش فيكم غلط في التاني أو حصل أي حاجه تبعدكم عن بعض
اتنهد - عشان ده طبع البشر ممكن تلاقي اتنين صحاب أوي وفجأة يبعدوا بسبب أو من غير سبب، سواء واحد وقعهم في بعض أو مثلًا اختلفت الظروف، ده ساب المكان أو الشغل اللي بيتجمعوا فيه وبقى كلامهم شات بس فاللي بيحصل إن عمر مصاحب شات أحمد مش أحمد نفسه
- إزاي؟
- يعني بيتكلموا شات زي الفل وضحك وهزار وهكذا لكن في الواقع بتحس إن ده شخص غريب مش عارف تكلمه كلمتين على بعض
بتنهيدة - يالا نرجع
- مالك؟
- فاكر بلال صاحبي؟
- صديق طفولتك لحد الجامعة؟
- آه
- اللي لما دخلتم الجامعة هو دخل سياسة وإقتصاد وبقى سفير إيطاليا؟
- آه
- اللي عرفتني بعده علطول؟
- اهاا
- اللي واحشك أوي؟
- أيوه يابني هو!
- أيوه بقى ماله؟
- راجع مصر أسبوعين
- امتى؟
بتنهيدة - بكرة
- و؟
- وعايز يقابلني
- فين؟
- في كافية....
بابتسامة - روح
بتردد- بس..
- بقولك روح يا أحمد
بتنهيدة - حاضر
__________••___••_________
- ها يا أحمد على معادنا؟
بارتباك - والله يا بلال الدنيا عندي ملغبطة ومش عارف هعرف آجي ولا لأ
- بالله تعالى يا أحمد
- بس...
- دانا وحشاني القعدة معاك ... وإن مقدرتش تيجي هناك ... هستناك المرة الجاية
بتنهيدة - جايلك
________••_____••_________
- السلام عليكم
- وعليكم السلام
- أنا في الكافية مستنيك على ترابيزة 2
- تمام
مشيت وأنا ببُص حواليا لقيت حراسة واقفة فعرفت إنه في مكان قريب من هنا، فتشت عليه بعيني ولمحته متغيرش كتير، قربت وأنا مُشتت لمحني فوقف بسرعة وبابتسامة قرب وحضني جامد، وقعدنا
- وحشتني جدًا يا صاحبي
- أخبارك إيه يا حضرة السفير؟
- إنتَ زعلان مني؟
- إنتَ شايف إيه؟
- فعلًا أنا مُعترف إني انشغلت عنك، عاتبني يا أحمد خلينا نِخَلَّص من بعض
بابتسامة - وميهمكش عادي ... إسمع مني السعادي ... مش وقت عتاب أو لوم
- آااه فيها إيه لو نرجع تاني ... وبدل ما تكون وحداني ... تسندني معاك ونقوم
بابتسامة - مفيش عتاب يا أحمد؟
بابتسامة - ولا حتى لوم
- يعني نرجع؟
ضحك - هو احنا كنا مفركشين ولا إيه؟
- مقصدش... قصدي نرجع أصحاب من تاني؟
- هو احنا كنا متخاصمين يابني؟
- لأ، بس... طول الخمس سنين اللي فاتوا مكنتش عارف أوصلك ومعرفش بتشتغل فين ولا أعرف عايش فين، ورقمك مكنتش لاقيه ولما عرفت أوصل لرقمك كان علطول مغلق
- وآدينا اتجمعنا من تاني
مد يده - يعني صافي يا لبن؟
صافحه بابتسامة - حليب يا قشطة
- ياااا أحماااد
قرب ولد صغير عنده خمس سنين
- نعم يا بابي
- ده أنكل أحمد اللي كلمتك عنه
- اللي ثمتني على إثمه؟
- آه
- هييييه
بصتله بصدمة - ابنك!
- أحمد ابني سميته على اسم أغلى شخص على قلبي
حضنته وفرحت إني قابلته ومسيبتش مخاوفي وكبريائي يتغلبوا عليا
- موووج الدنيا أناني وعالي
- وإنتَ لوحدك وأنا لسالي
- عمر هعيشه معاك لو يوم
- مااشي براحتك بس راهني
- على يوم منك وسنين مني
- إنك مبتعرفش تعوووم.
بابتسامة - وميهمكش عادي
- إسمع مني السعادي
- مش وقت عتاب أو لوم
- آااه فيها ايه لو نرجع تاني
- وبدل ما تكون وحداني
- تسندني معاك ونقوم
بهدوء - فاضي شوية؟
بابتسامة - وإن مشغول كله يفضالك
- عمري ما أنسالك أفضالك
- وعشانك كُله يهوون
_________••____••_________
ملحوظة:- الأغنية لحمزة نمرة، الكلمات كلها من أغنية "فاضي شوية"، ما عدا آخر ثلاث جُمل من أول وإن مشغول كله يفضالك، ده اجتهاد مني.
#وبدل_ما_تكون_وحداني.
#تسندني_معاك_ونقوم.
#ملك_أحمد| "مليكة".
جريدة عقول راقية، جريدة أدبية تحتوي على الكثير من النصوص والخواطر والغرض منها هو إحياء ودعم المواهب المدفون بكل أنواعها، فلكل منا عالم آخر يناسب عقولنا فهو من صنعه بذاته.
رئيس مجلس الإدارة: أسماء ياسر
💙💙💙
ردحذف