صحيت من النوم فِ آذان الفجر اتوضت وصلّت وقعدت تقرأ قرآن لوقت الشروق ،لبست ونزلت علي جامعتها
ندي: اتأخرتي ليه ياخلود !؟
خلود: الطريق زحمه جدا واللهِ
ندي: طب حصل خير يلا المحاضره هتبدأ
هاله: معرفش اول واحده بتصحي فينا واخر واحده بتوصلي لييه الله يسامحك
خلود: بس بقاا لما تخلصي خناقك ده هتكون المحاضره خلصت
هاله:طب يلا يا جميله
دخلوا وخلصوا المحاضره وكالمعتاد يعني اللي بيحصل مع خلود فِ كل محاضره للدكتور
محمد اللي بيرتبك وبينسي هو بيشرح اي اول ماخلود تدخل المحاضره لحد ماتخلص وتمشي وندي وهاله ملاحظين كده وطبعا كم من الهزار والضحك بعد المحاضره علي شكله وارتباكه
خلود: بس يابنات انتوا اكيد فاهمين غلط عادي زيي زي اي طالبه عنده مالكوا
ندي: اييي!! طالبه ايي!! دا علي اساس انه بيعمل كده لما بيشوف هاله او يشوفني يابنتي بقا كفايه هروب من الموضوع
خلود :طب ياريت كفايه بقا كفايه انا همشي علشان متأخرش
طول الطريق وهي بتفكر فِ نظراته وابتسمت لما افتكرت ضحكته
هي بتحبه! بالظبط بتحبه من اول سنه فِ الجامعه وهي حاليا فِ رابعه وخلاص فاضل كام شهر وتتخرج وخلصت الحكايه!!
وصلت البيت
مامتها: حبيبتي حمدالله علي سلامتك
خلود: الله يسلمك ياست الكل ، اخدتي الدوا. فِ مواعيده !!
مامتها: اه ياحبيبتي وجهزتلك الغدا يلا غيري هدومك وصّلي وتعالي نتغدي سوا
خلود:حاضر
دخلت اوضتها سمعت صوت الفون اشعار رساله واتساب فتحتها لقيّت الدكتور باعت مسچ
الدكتور محمد:ياريت ميبقاش فِ تأخير تاني علي محاضرتي انا ملاحظ ان دايما بتتأخري كام دقيقه علي محاضرتي انا بس ياريت ميتقررش..
خلود:عملت سين وسكتت شويه تفكر هو ازاي عرف انها بتروح كل المحاضرات فِ معادها إلا ليه هو!! أيعقل!! متابع مواعيدي ومهتم والكلام ده!! بس بس مهتم اي اكيد كان بيتأكد بس اني بحضر متأخر ليه هو بس ولا الكل بطّلي هبل بقا
خلود: ردت بعد السين ب عشر دقايق تقول تمام حاضر
= اي ده اي ده!! دا فِ الشات كل ده !! دا السين فِ نفس اللحظه
الدكتور: تمام حاضر!! يعني بعرفك انك بتتأخري ليا انا بس وعادي مفيش اعتذار !؟
خلود: هعتذر علي اي طيب!!انا اكيد بيبقا غصب عني وصدفه يعني
الدكتور: واللهِ !! طيب تمام نشوف الموضوع ده المحاضره اللي شبه مقصوده الجايه..
خلود: عملت سين ومردتش وادايقت من رده عليها..!
_ ايه ده!؟ ايه اللي انت عملته ده يامحمد الاه..! يعني بقالك ٣ سنين مش عارف تكلّمها برايڤت لسبب معين يوم ماتلاقي فرصه تتكلم بالطريقه دي!! لا مش معقول دماغك دي حقيقي !
خلود خلصت وخرجت تتغدا مع مامتها لقيت مامتها واقعه فِ المطبخ وفاقده الوعي صرخت جامد وقعدت تعيط ومش عارفه تتصرف ملحوظه( خلود والدها منفصل عن والدتها قبل ماخلود تتولد هي متعرفش غير اسمه يسري محمود وعايشه هي ومامتها لوحدهم فِ اسكندريه) نزلت تحت ندهت علي حد من الجيران
طنط امل الحقيني لو سمحتي ماما تعبانه طلعت معاها ولما مفاقتش طلبوا الاسعاف لها....
_صباح الخير
= صباح الخير يابيه
_اي ياعم ابراهيم مالك كده
=والله يا يسري بيه انا الحمدلله فِ نعمه بس تعبان شويه
_طب خد اجازه النهارده ياراجل ياطيب
=والله بجد يابيه كتر الف خيرك
_الو تعاليلي يانهي
دخلت نهي السكرتيره الخاصه بيه
(يسري محمود من اكبر رجال الاعمال فِ مصر ويملُك كذا فرع ومنهم فِ اسكندريه)
يسري فِ اي مواعيد النهارده
نهي: عند حضرتك ميتينج الساعه ٣بس
يسري: طب كويس ،بقول صحيح ابقي اخصمي من عم ابراهيم نص يوم شغل
=حاضر تمام .....
خلود:يادكتور لو سمحت طمني
الدكتور: السكر كان عالي جدا عليها والضغط كمان هي بقت كويسه خلاص بس ياريت متتعرضش لأي زعل او عصبيه تاني
خلود: فِ عقلها كده عصبية اي!؟ ماما كانت كويسه يلا المهم انها بخير ،، حاضر يادكتور
،تعبت حضرتك معايا ياطنط
لا ياحبيبتي ولا تعب ولا حاجه
روحت البيت وعندها فضول رهيب انها تعرف مامتها كانت زعلانه من اي وايه اللي يعصبها ويوصلها لكده!؟
مامتها دخلت تنام وترتاح
وخلود التفكير شاغلها قعدت سهرانه تقرأ قرآن جمب مامتها علشان لو صحيت
مامتها قلقت علي آذان الفجر كالمعتاد بتاعها
خلود: حمدالله علي سلامتك ياحبيبي قلقتيني عليكي يانوني ينفع كده
مامتها:الحمدلله ياحبيبتي خير انا كويسه
خلود:طب قوليلي بقا ي ست الكل انتي زعلتي من اي ولا حصل اي للعصبيه
مامتها: ارتبكت وبلعت ريقها بصعوبه كده وقالت م.. مفيش حاجه ياحبيبتي
خلود: بصت بااستغراب فِ اي ياماما...
اصل باباكي عرف مكاني
خلود بدهشه:ايييييي عرف ازاااي وبابا مين اصلا انتي بابا وماما انا معرفوش ومبقتش قادره تتكلم من العياط
مامتها:اهدي ياحبيبتي محدش يقدر ياخدك مني اهدي بس واخدتها فِ حضنها جامد وعيطوا سوا
خلود:ياماما هو عايز اي
مامتها:متخافيش ياخلود هو مش عايزك انتي هو عايز يحرق قلبي عليكي ويبعدك عني هو عايزني انا اللي ارجعله ولما رفضت قالي انه هياخدك
خلود:ازاااي هو اييي بالظبط انا عمري ماهعيش معاه عمريي ياماما اوعي تسبيني
مامتها:متخافيش انا عمري ماهسيبك وهنغير المكان ونروح اسماعيليه مكان كويس الاه طب والجامعه ياماما ..،، جامعه اي دلوقتي روحي علي الامتحانات وابقي خدي من صحابك المحاضرات
ازاي ياماما مروحش مينفعش طبعا قالت خلاص اجّلي السنه دي او شوفي هتعملي اي علي الاقل هتقعدي شهر متروحيش اول حاجه جت فِ بال خلود محمد هتشوفه ازاي !؟
بس افتكرت باباها واللي هيعمله تنهدت وقالت خلاص ياماما اللي تشوفيه وقضوا اليوم مع بعض ويسألوا ناس معرفه علي سكن فِ اسماعيليه لحد مالقوا موجود ويناسبهم
خلود راحت تاني يوم الجامعه علشان تودع صحابها وتعرفهم انها هتعزل لاسباب شخصيه محدش يعرف ان بابا خلود عايش اصلا
وهي واقفه معاهم شافت الدكتور محمد من بعيد رايح للمحاضره هو مشفهاش وفاجأه وقف ووقفت قدامه الدكتوره سلوي فضلوا يتكلموا حوالي سبع دقايق وكل واحد مشي من اتجاه مختلف وهي ادايقت جدا ومشيت هي كمان بعد ماكانت ناويه تروح تتكلم معاه وتعتذر علي تأخيرها وكمان انها مش هتيجي الكام محاضره اللي جايين اتنرفزت ومشيت
وصلت البيت لقيت مامتها بتجهز ف حاجتهم وماشيين
اي ياماما معقول النهارده بالسرعه دي!!؟
اه ياخلود النهارده انا خايفه
سافروا ووصلوا الشقه وعجبتهم خلود دخلت رتبت حاجتها وطول الطريق بتفكر فِ محمد ايوه اكيد بيحبها دي دكتوره زيه طبعا اي ده ياخلود حب اي اعقلي كده الاه..
انا متأكد اني شوفتها هي بس ملحقتش ومشيت علي طول اي الحظ ده كنت عايز اعتذر لها علي اللي حصل مني غريب انت يامحمد تغلط وترجع تعتذر طب ماكان من الاول وخلاص ،يلا بقا اللي حصل
ندي وهاله بيكلموا خلود بااستمرار وبتنقفل منهم كل حاجه مهمه وكانوا بيتكلموا مع الدكاتره انها عندها ظروف وياريت الغياب ميضرهاش وكده
ندي:الحمدلله الدكاتره ياخوخه كانت متفهمه الوضع جدا وربنا هداهم ليكي معرفش ازاي بس قالوا لازم تحضر من اول الشهر الجاي
خلود:ربنا يسهل ياهاله حاضر
_صباح الخير يابيه
=صباح الخير ياعم ابراهيم
يسري:علي فكره انا خليت نهي تكلم الحسابات تخصملك نص يوم علشان متبقاش ماتصدق الكلام وتسيب الشغل وطول اليوم مش عارف اشرب القهوه بتاعتي ولا الموظفين
عم براهيم:خ خصصم لله الامر،حاضر يابيه
يسري:اتفضل يلا
ماشي ياست نهال انتي مفكره اني مش هقدر اخد بنتي دا انا اوديكي فِ داهيه إلا خوخه انا مفرحتش بيها ولا عمري شوفتها سيبتي البيت من ورايا بعد اول نزوه ليا وحلفتلك انها مش هتتكرر وبعدتي عني سنييين كتير ولما اجي اعرف طريقك بالعافيه عن طريق الجامعات واسم بنتي فيهم واسأل فِ شوؤن الطلبه واعرف مكانك عايزه تخديها برضو ابداا هاخدها..
خلود عدي علي قعدتها فِ البيت عشر ايام ومحمد وحشها جدا ونفسها تشوفه او علي الاقل تكلمه وفاجأه جالها رساله واتساب
_خلود!!
اي ده وشها احمر واستغربت جداا
=نعم..
الدكتور محمد:مبتحضريش المحاضرات ليه هو يا تأخير ياغياب خالص طب اتأخري لو حابه ،،ابتسمت لا والله غصب عنكي يادكتور انا بس فِ ظروف كده ومش هعرف اجي الفتره دي
الدكتور:خير ان شاء الله ربنا معاكي،،وانا هبعتلك شرح كل محاضره متقلقيش
وشها احمر اكتر وخجلت اووي كده وردت متشكره لحضرتك جدا هتعبك معايا قالها ولا تعب ولا حاجه انتي طالبه متوفقه جدا مش معقول اخر كام شهر يضيعوا لسبب ظروف شخصيه يعني ربنا يوفقك
=شكرا يادكتور
_الشكر لله ياجميله
هي شافت جميله من هنا ووشها بقا كل الالوان مش احمر بس
_اي ده يامحمد ايه اللي بتقوله ده يعني بعد الخناق تقول ياجميله ، طب وفيها اي ماهي جميله برضو لاه ...
=ياالله جميله!! يارب متعلقش قلبي بيه اكتر من كده يارب انا خايفه...
_يسري راح الشقه جارتهم سمعته وهو بيخبط وسألها قالته دول عزلوا يااستاذ
=عزلوا فين!؟
_راحوا الفيوم
الفيوم!! اي ده اشمعنا كده..،
_فِ حاجه !؟
=لالا مفيش حاجه متشكر جدا ياريت بس لو معاكي عنوانهم اصل انا قريبهم وعايز اوصلهم ..،
_لا ممعيش للاسف
=طب شكرا
_الو ايوه ياام خلود انا عملت زي مانتي قولتيلي بالظبط
=بجد الله يباركلك
_ولايهمك مع السلامه
=الله يسلمك يارب، ياخلود
_نعم ياماما
=خلاص ياحبيبتي باباكي كده بيدور علينا ف مكان تاني خالص ،الحمدلله
_بجد طب الحمدلله ،، اقدر بقا اروح الجامعه وابقي ابات مع ندي اليومين المهمين اللي فيهم محاضرات واجي
= لسه شويه ياخلود انا خايفه احنا بقالنا كام يوم بس
_خلود بيأس تمام ياماما...
_خلود
=نعم يادكتور
_انا عايز اتجوزك
=اي دهههه خلود اتصدمت اي ده يتجوز مين ده ،، حضرتك بتقول اي
_ بلاش بقا حضرتي دي انا بحبك من زمان طبعا انا مكنش عندي الجرأه دي كلها اني اقول كده بس كنت قاعد مع بابا النهارده وكان بيحكيلي علي حبيبته اللي فضل ساكت ساكت لحد مافاجأه اتجوزت واختفت وقالي اني مخبيش حبي مهما كان رد الفعل
= بسس بس
_مفيش بس ممكن اخد من وقتك عشر دقايق نتكلم فون!؟
= ايي فون !؟
_ايوه الشات مينفعش
=طب طب تمام
اتصل بيها الو عامله اي ياخلود
الحمدلله كويسه طبعا هي مرتبكه ومش قادره تقول كلمه كامله علي بعضها من الشعور المختلط اللي عندها خوف علي فرحه علي قلق علي صدمه هي حقيقي مش مستوعبه ان كل ده بيحصل قطع تشتيت تفكيرها ده ب خلود انتي معايا
=اه اه انا مع حضرتك
_هههههه برضو حضرتي خلاص نمشيها حضرتي لو هتريحك انا اهم حاجه عندي راحتك جد يعني ..
اتكسفت جداا
=انا مش عارفه اقول اي حقيقي انا مش مصدقه اللي بيحصل
_انا مش عايزك تقولي حاجه انا عايز اعرف بس حاجه واحده ،،بتحبيني ياخلود!؟
=اي.....
_بتحبيني ياخلود لتاني مره
_انا لازم اقفل لو سمحت سلام
وقفلت الخط هو اتعصب جدا
اي ده انا مصدقت اقدر اقول كل ده اعمل اي تاني وبدأ يكسر فِ كل حاجه ويصرخ هي اكيد مبتحبنيش انا اتسرعت ولا اي
باباه دخل عليه ..، اي ده فِ اي يامحمد مالك
_حكيت لها يابابا اعترفت بحبي ليها وهي ولا علي بالها وسكتت وقفلت الخط بسرعهه لييه
=اهدي بس اهدي دا طبيعي ياابني هي بنت واكيد اتكسفت منك هترد باايه اهدي بس اهدي وكل حاجه هتتحل
فات اسبوع من وقت اللي حصل لا هو بينزل الجامعه وخد
اجازه مرضيه وتعب جدا
وهي مبتنامش من التفكير لحد ماتعبت وحكت لمامتها علي اللي حصل وانها خايفه توصل للمرحله بتاعت مامتها ومستحيل تتجوز هي اه بتحبه بس لا هتقوله ولا هتتجوزه..
مامتها: اهدي بس الرجاله كلها مش زي بعضها اكيد يمكن هو مختلف
=لا ياماما كلهم رجاله زي بعض
(وزي مابيقولوا كلهم مصطفي ابو حجر ) لا دي من عندي انا اكيد خلود مش هتقول كده يعني !!
_ والد محمد طلب منه انه يكلم خلود ،محمد رفض جدا وقال لا يابابا انا مش هجرجك وبرضو مش هيأس انا هحاول تاني معاها ومش هسيبها انا عارف عنها كل حاجه يابابا وعارف ان باباها رجل الاعمال يسري محمود
_اييي بتقول مين!؟
=محمد بعدم فهم ايوه اكيد سمعت عنه هو معروف اصلا يسري محمود
_سعد راح فِ حاله توهان ورجع بالماضي ٢٥ سنه وافتكر انه كان صديق يسري جداا بس يسري من اول ماوالده اتوفي وطبعا لأنه الوريث الوحيد واخد ثروه والده كلها نسي كل اصحابه وبعد عنهم ومن ضمنهم سعد اكتر صديق كان قريب منه
=بابا باابا فِ اي مالك
_لالا مفيش اصل افتكرت اسم باباها يعني حسيت اني سمعته قبل كده #طبعا هو مش عايز يقوله ان باباها راجل مش كويس وميتناسبش
=اه ماهو معروف بس هو راجل ظالم بقا
_اي ده انت تعرف عنه حاجه!؟
=اه طبعا انا بقالي سنه بحاول اعرف كل حاجه تخص خلود وعرفت ان باباها ظالم ف شغله وبيستغل الناس وبيستغل سلطته وانه ساب مامتها قبل ماتولد خلود وهي اكيد متقعده من كده وانا لازم اغير تفكيرها
_ ربنا يوفقك ياحبيبي ويسعدكوا اهم حاجه عندي خلي بالك من نفسك
= حاضر يابابا دعواتك...
الباب بيخبّط
_خلود :مين!؟
الباب خبّط اكتر
_خلود: م ميين
= اي ياست خلود احنا جايين كل المشوار ده علشان تسبينا علي الباب كده !؟
اي ده!! وفتحت الباب بسرعه
_هاله، ندي عاملين اي اتفضلوا وحشتوني اوي
=انتي وحشتينا اكتر والله،عامله اي
_الحمدلله كويسه اووي واكتر لما شوفتكوا
= احنا مصدقناش لما وافقتي علي اننا نعرف المكان كنا مفتقدينك جداا
_والله انا كان نفسي اعرفكوا من اول يوم بس خوفت اني اخلف وعدي مع ماما ان محدش يعرف مكانّا بس انا اقنعتها الحمدلله
=اي يابنتي اللي حصل لكل ده
_اي لالا محصلش حاجه تشربوا اي صحيح ولا شُرب اي انا عملت غدا قمر شبهي هههههه
=ماشي ياست خلود خلينا ناكل من ايدك وحشتنا عمايلك جدا هههه
_دقايق وهجهز الاكل
=السلام عليكم ازيكم يابنات
_ازي حضرتك ياطنط يارب تكوني بخير
_الحمدلله كويسين
=اخبار الجامعه والمحاضرات اي
_الحمدلله كله تمام
=ربنا معاكوا ياحبايبي
_خلود: يلا يابنات الاكل جاهز
_اتفضلوا ياقمرات
=حاضر ياطنط
خلصوا الغدا وكم من الهزار والضحك وكلام البنات بقا وحكوا كل اللي فاتهم مع بعض
_يلا فِ رعايه الله
=طب كنتوا قضوا معايا اليوم وسافروا بكره
_لا بكره اي دا انا عندي مذاكره قد كده
_وانا كمان والله وان شاء الله هنوصل بدري الساعه لسه ٤ اهو
=ربنا معاكوا طمنوني اول ماتوصلوا
_ان شاء الله مع السلامه وياريت تنزلي الجامعه بقا
=ان شاء الله قريب ،واهو هذاكر فِ المحاضرات اللي جبتوها دي ،مع السلامه ....
الباب خبط
_يسري بيه
=ايوه ياحمدي عملت اي
_مفيش اي حد يعرف عنهم حاجه فعلا يابيه وحاولت اعرف مكانهم فِ الفيوم معرفتش برضو..
=وبعدين بقا هجيبهم منين دول ،،طب خلاص امشي انت ،،
معقول بنتي رفضاني للدرجه دي ،طب اعمل اي اخليها ترضي عني وترجعلي انا لسه بحب نهال ومعرفتش اتجوز غيرها طول السنين دي ،طب طب اي الوحش اللي فيا خلاّهم مش عايزين يشوفوني ويعزلوا بسببي ،معقول يايسري بعد السنين كلها يضيعوا منك تاني وخلود اللي انت سميتها وهي لسه فِ بطن امها من قبل ماتشوفها وانت متعلق بيها
،واكيد نهال لسه بتحبني بس بتكابر انا عارفها علي الاقل متجوزتش،انا لازم اتكلم معاها لازم اتغير علشانهم علشان بنتي لازم...
_صباح الخير يادكتور
=صباح الخير ياندي
_حضرتك قولت ل هاله انك عايزني،
الدكتور محمد:اا اه اه عايزك ايي... عامله اي فِ المذاكره
_ندي: بااستغراب الحمدلله تمام
= هيٰ هيٰ خلود هتغيب اكتر من كده!؟
_خلود!! حقيقي مش عارفه يادكتور ، بس هي قالتلي انها هتيجي قريب والكلام ده من يومين
=يومين! هي تليفونها مفتوح اصلا..!؟،، اصل اصل يعني كنت بحاول اكلمها علشان الغياب او لو احتاجت شرح او حاجه خلود طالبه متفوقه ومكنش ليها فتره الغياب دي ..
_لا هو الحقيقه هي كلمتنا من تليفون مامتها وروحنا لها بيتها الجديد
=جديد! هي عزلت !؟
_اه عزلت فِ اسماعيليه
=اسماعيليه لازم علشان باباها بتهرب منه
_بتقول اي يادكتور
= ها لا لا مفيش طب لو سمحتي ياندي ممكن العنوان علشان فِ حاجه تخُص خلود لازم تعرفها
_عنوان هوالمشكله بس ان خلود قايلالي محدش يعرف العنوان ده مهما حصل وانا خايفه تزعل مني فاانا هعرفها واقول لحضرتك ..
=طب هتعرفيها ازاي وانتي بتقولي تليفونها مقفول
_لا ماهو انا معايا رقم طنط
=طنط..! طب خلاص ممكن تجيبي رقم طنط وانا هكلمها
_خلاص تمام ثواني....، اتفضل اكتب عندك
=..... تمام ياندي متشكر ،سلام...
_السلام عليكم
=وعليكم السلام ورحمه الله وبركاته،، انا الدكتور محمد سعد الدين ، ازي حضرتك
_الحمدلله ، مين الدكتور محمد
= انا دكتور فِ جامعه خلود
_اه اهلا وسهلا ب حضرتك
=ربنا يخليكي ، لو سمحتي ممكن اتكلم معاكي بس ياريت من غير علم خلود
_ !! اه اه اتفضل يابني
=......
_خلاص يادكتور ربنا يسهل الامور، فِ رعاية الله ..
محمد:السلام عليكم عامل اي ياحبيبي
والد محمد:الحمدلله اي ده اللي يشوفك النهارده ميشوفكش امبارح
_فرحان جدا يابابا فرحان ، انا اتكلمت مع مامت خلود
=صحيح!؟ اتكلمت معاها امتي وحصل اي
_هحكيلك كل حاجه بس اغير هدومي علي اما يجهزوا الغدا علشان مااكلتش من الصبح
=طيب ياحبيبي اطلع انت ونتكلم بعدين،، محمد!
_النهارده ثانويه ماما يابابا انا مش ناسي اكيد الله يرحمها
=ربنا يبارك فيك ياحبيبي ،اللهم امين ، اطلع انت بقا...
_اي يابنتي عامله اي
=الحمدلله ياندي بخير
_ها بقا قوليلي كان عايز اي!؟
=هو مين!؟
_هو مين اي الدمتور محمد
= اي ده ماله حصل اي
_هو مش كلمك علي تليفون مامتك!؟
=لا مكلمنيش هو عرف رقم ماما منين
_اصل..، اصل هو طلب مني العنوان ف انا مردتش قومت اديته الرقم
=عنوان ،، ورقم ليه!؟
_معرفش هو قال حاجه تخصك ف انا حاولت اخليه يوصل ليكي
=بس ماما مقالتش حاجه ليا يمكن مكلمهاش
_لا لا كلمها علشان وقتها انا سيبته ومشيت وهو بيتصل
=غريبه دي ،، طب خلاص انا هسأل ماما كده، مع السلامه انتي
_ماما هو حد كلمك النهارده سأل عليا!؟
=ليه بتقولي كده
_اصل ندي قالتلي ان فِ دكتور سأل علي عنواني وهي مقالتش ف اخد رقم تليفونك
=الدكتور محمد اه
_كان عايز اي
=ولا حاجه كان بيطمن عليكي دكتور محترم محدش بقا بيعمل كده مع الطلبه بتوعه
_بس!!
=بس اي
_لا مفيش مقالش حاجه تانيه يعني!؟
=لا مقالش هو فِ حاجه
_لالا مفيش، انا هدخل انام، تصبحي علي خير ياماما
=وانتي من اهله ياحبيبتي
دخلت اوضتها وقعدت تفكر فِ كل الاحتمالات وفكرت تفتح تليفونها وتسأله بس قالت لالا ماهو لو كان قال حاجه كانت ماما قالت *متوهميش نفسك ياخلود* غلبها النوم ونامت..
_ياه يامحمد انا مكنتش اعرف انك جرئ كده ههههه بس جدع
=ههههه طب اعمل اي يابابا مكنش قدامي غير كده ، ولسه اهم خطوه
_خطوه اي تاني
=لا دي بقا مينفعش يتقال عليها غير لما تحصل الصبر بس ...
_عامله اي ياخوخه
=الحمدلله ياندي وحشاني
_وانتي كمان كتير ، ها عرفتي حصل اي
=لا كان عادي بيطمن
_بيطمن اي بعد كل ده يعني هو كان عايز عنوانك علشان يطمن بس دا غريب جدا
=اهو ده اللي ماما قالته ليا
_اه ممكن برضو ....
_يسري بيه فِ حد عايز يقابل حضرتك
=مين ده
_بيقول اسمه الدكتور محمد
=بس انا معنديش وقت مأجلتيش المعاد ليييه انتي بتتصرفي من دماغك انا مش فاضي خليه كمان يومين
_حاضر تمام..، للاسف يادكتور يسري بيه مشغول جداا ومش هيقدر يقابل حضرتك غير بعد يومين او تلاته
=يومين اي لا مينفعش انا عايزه فِ حاجه ضروري ، طب لو سمحتي قوليله حاجه تخُص خلود
_صدقني هو مشغول مينفعش
=ياريت تبلغيه بس
_تمام، حضرتك هو بيقول انه جاي ف حاجه تخُص بنت اسمها خلود
=اييي خلود دخليه بسررعه يلا
_مساء الخير ، انا الدكتور محمد
دكتور ف جامعة خلود
=اهلا اهلا وسهلا ب حضرتك ،تشرب اي
_لا ولا اي حاجه انا افضّل اننا ندخل ف الموضوع علي طول..
=طب تمام اتفضل حضرتك...
_شوفي مين بيخبط ياخلود
=حاضر ياماما ثواني بلبس الاسدال
خلود فتحت الباب وبقت فِ اكبر حاله استغراب وصدمه ف نفس الوقت ..
_اي ده دكتور محمد ، ح حضرتك عرفت العنوان منين، اي ده مين حضرتك!؟
=طب هتسبينا علي الباب كده
_اي اه اه اتفضلوا ، ثواني
_ماما ماما فِ ناس بره ، الدكتور محمد اللي كلمك ومعاه حد كمان
=طيب انا خارجه اهو،، السلا.. اي ده انت عرفت عنواني منين ، يعني حضرتك يادكتور تعرف مكاني انا وبنتي وتجيب حد معاك كمان وانت جاي
=اهدي بس ياست الكل انا هفهمك كل حاجه، انا عارف ان اتفاقي مع حضرتك كان اني اقنع خلود اني غيير واني فعلا بحبها واحاول اتكلم معاها لما اجي بس انا كمان اعرف يسري بيه وروحت قابلته واتكلمت معاه وهو كمان عنده كلام كتير عايز يقوله ولاقيت ان افضل حاجه انه يبقا موجود علي الاقل خلود تقرب منه هو كمان
_تقرب من مين يادكتور
=منّي يانهال منّي انا ابوها زي مانتي امها انا عارف اني غلط زمان ف حقك وحقها وكمان غلط فِ حق نفسي بس مش كفايه السنين دي كلها انا محتاجكوا جمبي اوي بلاش _نضيع اللي باقي من عمرنا تعالي نسامح وننسي ونرجع انا حقيقي ندمان اديني فرصه تانيه
_فرصه تانيه..!؟ انت عارف انا اتبهدلت قد اي عارف انا عملت اي علشان اربي خلود واكبرها كده انت كنت دايما بعيد حتي واحنا مع بعض انا اديتك فرص كتير ، الوقت عدي خلاص يايسري
=علشان خاطري طب بلاش خاطري علشان خاطر خلود
_خلود!!؟ حضرتك لسه فاكر انك ليك بنت!؟، انت ازاي قدرت تسيبني كل السنين دي انا عمري ماشوفتك انت متخيل بنت متعرفش ابوها
= لا ياخلود انا عمري مانسيتكوا كنت دايما بدور عليكوا انا كنت نزولك للدنيا بفارغ الصبر كنتي وحشاني من قبل مااشوفك سامحيني ياخلود سامحيني يانهال انا مستعد اختفي خالص لو ده هيريحكوا بس انا عايزكوا فِ حياتي، محمد بيحبك ياخلود وانا بحبك جداا وعايز السنين دي نعوّضها ادوني فرصه تانيه انا اتغيرت وهتغير اكتر علشانكوا خلوني اكون معاكوا وسامحوني ربنا بيسامح
_نسامح اي يايسري دا...، افتحي الباب ياخلود شوفي مين..
=مساء الخير
_مساء النور ، مين حضرتك
مين ياخلود
_معرفش ياماما حد ومعاه مأذون
مامتها بصت بااستغراب جدا وقامت تشوف مين ، مين حضرتك
_ازيك ياست نهال
=الحمدلله ، مين !؟
_سنين كتير عدت برضو ، انا سعد، سعد الدين كنت دفعتك فِ الجامعه
=معقول اهلا اهلا وسهلا اتفضلوا
_السلام عليكم
=وعليكم السلام ورحمه الله وبركاته من كل اللي موجود
خلود دخلت اوضتها وهي لا عارفه تفهم ولا تستوعب حاجه
بعد شويه مامتها ندهت عليها
_نعم ياماما
= محمد وقف وقالها تتجوزيني ياخلود!؟
هي ايي بتقول اي وفِ حاله ذهول
=طب نقول تاني ومفيش حد غريب بابا وصاحب باباكي وفرحوا جدا انهم اتقابلوا بعد السنين دي وكمان كان دفعة ماماتك ، والمأذون جاي يكتب الكتاب اصلا انا بسألك ليه ، اتفضل حضرتك دي العروسه وانا العريس وباباها موجود الوكيل بتاعها اتوكل علي الله
هي ابتسمت جامد والدموع اتغلّبت علي عيونها ومبقتش قادره تتكلم من الفرحه ، باباها وقف ومسك ايديها سامحيني ياخلود سامحيني يابنتي دموعها نزلت بسرعه جدا وراحت فِ حضنه ومسكت ايد مامتها وحطت ايدها فِ ايد باباها ، *انا عايزه كل واحد فينا يبدأ حياه جديده كلنا بنغلط وبنتعلم من غلطتنا بس الأهم انه ميتكررش تاني مفيش مانع اننا نسامح وندي فرصه حبوا بعض وابدأوا مع بعض من جديد واصفوا لبعض مفيش حاجه تستاهل الزعل صدقوني* اتكتب كتابها وفرحة محمد بيها والحضن اللي اخدوا منها فِ وجودهم كلهم وانها خلاص بقت حلاله علي سنة الله ورسوله صلي الله عليه وسلم ، يعني ينفع كده يتكتب كتابي وانا بااسدال البيت ،
ماله اسدال البيت ياخوخه جمالك مغطي علي اي حاجه بتلبسيها وبعدين خلاص هسيبك تجهزي نفسك للفرح وياريت متنسيش الاسدال ده تجبيه معاكي علشان نلبسه لبنتنا وهي بتتجوز ههههه ابتسمت جامد ، ان شاء الله
فرحة مامتها وباباها بيها مكنش ليها وصف واخدوها ف حضنهم واتفقوا كلمهم انهم يبدأوا من جديد
هدير_احمد
جريدة عقول راقية، جريدة أدبية تحتوي على الكثير من النصوص والخواطر والغرض منها هو إحياء ودعم المواهب المدفون بكل أنواعها، فلكل منا عالم آخر يناسب عقولنا فهو من صنعه بذاته.
رئيس مجلس الإدارة: أسماء ياسر
ليست هناك تعليقات:
إرسال تعليق