وعد/ إتأخرتي ليه يا غيبوبة هانم؟
حور/ بس يا وعد متفكرينيش..
جالي فـ الحلم تاني.
وعد/ يادي النيلا السودة عليكي وعلى احلامك يا شيخة هو انتي كل يوم تحلمي بـ توم كروز المجهول بتاعك ده وتوقفيني ساعة فـ الشمس استناكي!
وشي بااااااظ
حور بـ ضحك/ طيب يلا ياختي مش من أول يوم كدة هنتأخر
وعد/ يلا يا أخرة صبري
_ وعد وحور أصحاب من أيام إعدادي ومع بعض لحد ما بقوا فـ نفس الكلية وده أول يوم ليهم فـ سنة تالتة كلية
*فلاش باك*
وعد/ بس يا ستي وبعد ما نخلص كل ده هننزل نشتري الحاجات اللي قولتلك عليها علشا.... حور.. حور مش بكلمك..... حووووووور
حور بـ خضة/ في ايه ربنا ياخدك حد يخض حد كدة
وعد/ نهارك مش فايت انتي مسمعتيش كل اللي قولته ده بجد! ده انا بقالي نص ساعة بتكلم وبقول مشاريع ومغامرات وانتي ولا انتي هنا
حور/ ما انا اللي حصل معايا محصلش مع حد
وعد راحت قعدت جمبها وقربت منها اوي وقالتلها/ ايه اللي حصل هاا هاا احكيلي
حور/ حلمت بـ شخص وسيم اوي طويل كدة واسمراني وعيونه سود وعضلاته متوسطة وشعره اسود ناعم حاجة كدة زي اللي فـ الروايات
وعد باندماج/ وبعدين حصل ايه
حور/ كنت فـ المستشفى وهو كان جمبي وماسك ورد حطه جمبي وابتسم ومشي وهو واخد قلبي معاه بـ ضحكته دي يخربيت سنينه
_ حور كانت بتحكي وهي سرحانة اوي فـ وصف شكله وملامحه و وعد كانت قاعدة مندمجة مع الحلم ومع ملامح وش حور اللي عمرها ما شافتها كدة قبل كدة
*باك*
حور/ اوف كان يوم مرهق اوي انا هروح اخد السرير بـ الحضن
وعد/ ابقي سلميلي على توم كروز اكيد هيزورك ف الحلم النهاردة
حور ابتسمت وطلعت بيتها وكمان وعد اللي بيتها بعد بيت حور بـ خطوات
*فـ بيت وعد*
وعد/ ساموعليكوا يا اهل البيت
مامتها/ عليكم السلام ياختي داخلة عاملة دوشة ليه
وعد/ ده بدل ما تستقبليني بـ نص فرخة مشوية على الباب ولا حتة مكرونة باشاميل او حتى كوباية عصير ده انا هفتانة طول اليوم
مامتها/ بااااس ايه كل ده ما تيجي تاكليني احسن
وعد/ لا ياست الكل ومين يعملي الاكل بعد كدة
مامتها/ صبرني يارب على خلفتي المهببة دي، ادخلي غيري هدومك وصلي واكلك جوا
وعد/ حمامة يا حجة
*فـ بيت حور*
حور/ سلام عليكم ياشوباب سريري فين علشان عايزة انام جامد اوي
مامتها/ مخلفة غيبوبة ياربي، طب كلي الأول
حور/ انا جعانة فعلا بس جعانة نوم اكتر هصلي وانام ولما اصحى نشوف موضوع الاكل ده
مامتها/ طيب ياحبيبتي
_ دخلت حور أوضتها ونامت بعد تفكير طويل فـ الشخص اللي بقا ملازم حلمها وهي متعرفوش وبعد كدة غرقت فـ النوم
*فـ الحلم*
تيم/ واقف بعيد وبـ يبص فـ ساعته وشعره بيطير يمين وشمال وحور شايفاه من بعيد وعمالة تبص حوليها مش شايفة حد، وتيم اول ما شافها راح عليها
وقف قدامها بـكل ثقة وبيبتسم
حور متنحة وبتقول فـ نفسها/ يعني هو علشان بيضحك ضحكته القمر دي فاكر اني هسكتله يعني
بـ توتر/ بـ .. بس يعني هقوله ايه، ياربي ايه الحيرة دي
تيم/ ها خلصتي توتر
حور بـ صوت واطي/ الااه ده طلع صوته حلو كمان
تيم ضحك وقالها/ مالك بقا خايفة مني ليه
حور بعد ما افتكرت انها قادرة على التحدي وعلى المواجهة وافتكرت روبانزل وهي خايفة من يودجين وضربته بـ الطاسة وربطته بـ شعرها فـ الكرسي وفـ الاخر حبوا بعض واتجوزوا قررت تسترد شجاعتها بالظبط زي ما سيمبا استرد ارض العزة من سكار والضباع وتقوله/ هو انت مين؟ وليه بحلم بيك كل يوم؟ ان ..ان ..انا معرفش انت مين حتى عمري ما شوفتك فـ الحقيقة
تيم/اوعدك هتشوفيني قريب اوي وهتزهقي مني كمان ....
واختفى
حور بـ خضة بـتبص حوليها وبتدور عليه فـ كل حتة
لكن صحيت على صوت مامتها بتقولها/ حور اصحي بقا وعد بـتتصل بيكي من بدري وبتقولك لو منزلتيش هتطلع هي ترميكي من البلكونة
حور/ حاضر هقوم اهو
قامت حور اتوضت وصلت فرضها ودعت ربنا انه يديها اي اشارة للي بيحصل ده ولبست ونزلت وهي منتظرة اللي هيحصل فيها من وعد
وعد بـصوت محمد هنيدي/تعاليلي بقا علشان انا سكتالك من بدري
حور بـضحك/ هفهمك طيب
وعد/ تفهميني ايه يا باردة انا بقالي ساعة ونص مستنياكي وده خارج حدود الطبيعة
حور خدتها تحت دراعها ومشيوا وهي بتقولها/ خلاص متزعليش
وعد/ سيد عيب متقولش كدة احنا اهل
_وصلوا الجامعة وكـ العادةبعد يوم طويل وعد روحت جعانة وحور روحت عايزة تنام
*وهما مروحين*
وعد/ ااه ياني على البطة البلدي اللي انا مصاحباها دي
حور/ بتقولي حاجة
وعد/ ااه ياختي بقول بصي كدة "وبتشاورلها على اصحاب بياكلوا ويتصوروا والدنيا حلوة بصوت علي ربيع"
حور/ طيب بصي انتي كدة "وبتشاورلها على كذا شاب واقفين يتفرجوا على البنات دي وطبعًا اللي بعد كدة مفهوم"
ايه رأيك تحبي تبقي فـ الموقف ده، ياشيخة احترمي خمارك حتى
وعد/ اكيد لا يعني بس يا حور احنا بجد عاملين زي ستات البيوت من الجامعة لـ البيت لـ الاوضة مبنعملش حاجة تاني فـ حياتنا وانا ملِّيت
حور/ بسيطة كلمي مامتك قوليلها انك هتقضي اليوم عندي النهاردة وانا هظبطك
وعد/ ايوا بقا يا ابو الصحاب هكل .... بس انا مش معايا رصيد
حور/ هتشليني، خدي اتكلمي من عندي
_كلمت وعد مامتها وبعد محايلة من وعد وحور اخيرًا وافقت
*فـ بيت حور*
وعد/ أين طنط أنا لا أراها
حور/ انتي لسة دخلتي علشان تشوفيها
مامت حور/ صوتكوا عالي ليه الهي تنفضحوا زي ما انتو بتفضحونا
البنات بـضحك/ شكرًا يا ست الكل
حور/ ماما معلش هتعبك معانا بس جهزيلنا البلكونة
وعد بتجري ناحية باب الشقة/ يختااااااي جايباني ترميني من البلكونة مكانش العشم يا حور لااااا طب اكل الاول والنبي واعرف امي اني هموت واسلم عليها واكل شيكولاتة وانام ساعة بس
حور بـضحك هستيري/ والله انا اللي شكلي هنط من البلكونة علشان مستحملاكي، قدامي على جوا
ودخلوا اوضة حور بعد ما اتوضوا وقاموا يصلوا مع بعض
حور/ يلا نطلب دليڤري
وعد/ اشطا هتطلبي ايه
حور/ بيتزا وكريب
وعد/ يلا بينا
_وبالفعل طلبوا الاكل وقعدوا يرغوا ويتصوروا لحد ما الاكل وصل وحور اقترحت ياكلوا فـ البلكونة
البلكونة دي المكان المفضل لـ حور فـ البيت بعد اوضتها لانها بـتطل على كورنيش البحر والشجر اللي تحت بيتهم، مهتمة بيها اوي وملياها زرع وعصافير وكراسي وكتب ولما بتحب تريح اعصابها بتعمل قهوتها وتدخل جوا
وعد/ يلا علشان جعانة جامد اوي
حور / يلا
_حور سرحت وهما بياكلوا وعد سألتها/ مالك؟
حور/ مش عارفة يا وعد، كل يوم بشوفه فـ الحلم، حسة اني اتعلقت بيه اوي، عارفة لو يوم محلمتش بيه مبعرفش انام، اتعودت على شكله وصوته وضحكته وحبيتهم اوي، مش عارفة ايه اللي بيحصلي ده يا وعد
وعد/ صلي استخارة ياحور وان شاء الله ربنا هيريح قلبك
حور/ حاضر
_خلصوا اكل وقاموا يعملوا قهوة ويجيبوا حاجة حلوة ياكلوها ورجعوا البلكونة
وعد/ يوم جامد اوي، تسلملي يا ابو الصحاب
حور/ااه فعلا اليوم مختلف جدا حتى غيرنا جو الجامعة والاشكال اللي بنشوفها كل يوم
_جت الساعة 9 وموبايل وعد رن
طبعًا مامتها
وعد/ الو ايوا يا نبع الحنان
مامت وعد/ اتأخرتي ليه يا موكوسة الساعة 9 ايه رقاصة حضرتك
وعد/ ياحجة انتي لو بصيتي من البلكونة هتشوفيني وانا والبت حور واقفين فـ البلكونة بهديها بتعيط حتى اسمعي "وبتغمز لـ حور انها تعمل بتعيط"
حور مش فاهمة حاجة بس مضطرة تنقذ الموقف/ اهئ اهئ اهئ اهئ
وعد/ سمعتي
مامت وعد/ مالها حور
وعد/ مفيش ماسكة فيا مش عايزاني امشي وانا بقنعها اني هجيلها تاني
حور وهي بتضربها/ ده اللي هو انا برده
مامت وعد بعد ما فهمت انهم بيهزروا / نص ساعة ياكلب البحر والاقيكي قدامي وقفلت فـ وشها
حور بضحك على صاحبتها/ انا مشوفتش اهانة بـ الشكل ده
وعد/ هزري ياعسل ليكي يوم
ااه بقولك، لو اتأخرتي بكرة هعمل معاكي الجلاشة
حور/ ايه الالفاظ دي في بنت محترمة تقول كدة
وعد بصوت تامر حسني / مش انا قولت كدة
حور/ ااه
وعد/ يبقى في .... سلام
حور بضحك/ سلام يامجنونة
_مشيت وعد، ودخلت حور تصلي استخارة زي ما وعد قالتلها ونامت
*فـ الحلم*
حور لقت نفسها لوحدها فـ مكان كبير اوي وواسع، فضلت تبص حوليها لحد ما لمحت طيف تيم فـ اطمنت
جه تيم وعلى وشه فرحة اكتر من كل مرة واول ما شاف حور عيونه دمعت
حور/ مالك؟
تيم/ عايز اسألك سؤال
حور/ اسأل
تيم/ ت .. تت ....
حور/ في ايه مالك؟
تيم/ تتجوزيني ياحور
حور بـكسوف وتوتر/ اتجوزك!
تيم/ ايه! مش موافقة؟
حور/ مقصدش بس.. انا حتى معرفش اسمك ايه
سكتت وبعدين قالت بـ حزن/ وبعدين اتجوزك ازاي، انت نسيت ان احنا فـ حلم
تيم/ اسمي تيم، ووافقي انتي بس وانا اخليلك الحلم ده حقيقة
حور/ ولو قولتلك ان انا موافقة
تيم/ هقولك ان انا بحبك اوي
وطلع من جيبه علبة ولبسها خاتم فـ ايديها وابتسموا الاتنين
صحيت حور على صوت مامتها وصوت وعد
وعد/ ياطنط دي غيبوبة دي مش هتصحى هاتي مية ساقعة بس هحطها فـ قفاها
حور/ ااه يامفترية
وعد/ ناس متجيش غير بـ العين الحمرا
مامت حور/ قومي يلا جايلك عريس النهاردة
قامت حور بـ خضة/ عريس!
وعد/ عريس، وهتتجوزي واخلص منك بقا وابقى صاحبة العروسة وتخلفي عيال يقولولي يا خالتو واربيهم انا
حور/ والله ما يحصل كله الا عيالي
مامت حور/ انتو خلاص قررتوا انها اتجوزت وخلفت وبتتخانقوا مين يربي العيال اروح اموت انا وابوكي بقا
حور/ لا ياست الكل بعد الشر، بس قوليلي مين اللي مامته دعياله ده اللي هياخدني
مامت حور/ تيم ابن طنط جميلة جارتنا، مسافر من وهو فـ ثانوي مع باباه برة مصر ودلوقتي رجع وبيدور على عروسة واختارك انتي
حور بـ ذهول/ حاضر يا ماما هقوم اجهز، خليكي معايا يا وعد
وعد/ حاضر
_خرجت مامتها وحور مازالت مذهولة من اللي بيحصل
وعد/مالك ياحور؟ من ساعة ما طنط قالتلك مين العريس وشكلك مش مريحني
حور بـ دموع فرحة/ هو يا وعد هو، هو اللي بييجي فـ حلمي ازاي معرفتوش، ده احنا طول عمرنا واحنا صغيرين بنلعب مع بعض لحد ما هو سافر وكان ....
*فلاش باك*
حور/ انت خلاص مسافر يا تيم
تيم/ مش عايز اسافر واسيبك ياحور، نفسي تسافري معايا وتفضلي جمبي العمر كله
حور/ مينفعش تمشي انا معرفش حد غيرك ومش بلعب غير معاك
تيم/ لازم اسافر شغل بابا اتنقل وكلنا هنسافر، بس اوعدك مش هنساكي ابدًا وهجيلك تاني
حور/ هتتأخر؟
تيم/ مش عارف، لكن كل اللي متأكد منه اني هشوفك تاني
حور دمعت ومشيت وهو ركب عربية باباه ومشيوا
*باك*
وعد/ يااااه، ولسة فاكرك لحد دلوقتي
حور/ وراجع يتجوزني زي ما وعدني، انا فرحانة اوي
وعد حضنتها/ ربنا يكملهالك على خير يارب، يلا يا عروسة علشان تجهزي نفسك
حور/ يلا نصلي الاول
_قاموا صلوا ودخلوا يجهزوا، حور لبست دريس بيبي بلو وخمار اوڤ وايت ومحطتش اي ميكب خالص وجه معاد وصول تيم
الباب خبط وباباها فتحله ودخل قعد معاه وحور صممت تعمله القهوة بنفسها، ما هي اكتر واحدة عارفة هو بيحبها ازاي
دخلت حور بالقهوة وحطتها وقعدت قدامه
"طيب نسيب العرسان مع بعضهم شوية"
_فـ اللحظة دي انا قلبي دق جامد اوي، معرفش علشان كل اللي تعبت علشانه بيتحقق قدامي، والبنت اللي طول عمري بطلبها من ربنا هتبقى ليا اخيرًا، بس كل اللي اعرفه اني فرحان اوي.
_فـ اللحظة دي فرحتي كانت قد الدنيا، اخيرًا الحلم بيتحقق والمجهول اللي حبيته فـ حلمي هيبقى حلالي، لا ومش بس كدة ده كمان هو هو حب سنين الطفولة كلها.
تيم/ لسة حلوة زي ما انتي يا حور، لسة بـنفس براءتك وطفولة ملامحك متغيرتش، وحشتيني اوي ياحور
حور/ اخيرًا رجعت يا تيم، كل دي سنين غايب عني فيها، انت كمان وحشتني اوي
_قعدوا يفتكروا زمان وكل اللي كان بينهم وحور حكت ليه عن احلامها بيه طول الفترة اللي فاتت وكانوا فرحانين اوي
"ها نقول مبروك يا ولاد"
تيم/ وكتب الكتاب الاسبوع اللي جاي
_"بارك الله لكما، وبارك عليكما، وجمع بينكما في خير"
حور واقفة مذهولة من الفرحة وتيم حضنها اوي ومسابهاش وهي كانت متبتة فيه اكتر
تيم/ مبروك يا احلى عروسة شافتها عيوني
حور/ مبروك عليا انت يا نن عيوني
*"ان جار عليَّ الزمن، وان ارهقتني الحياة، لن انساكِ، فقد كان حبك رفيقي في غُربتي"*
*"ان جار عليَّ الزمن، وان ارهقتني الحياة، لن انساكَ، فقد كان حبك رفيقي في حلمي"*
جريدة عقول راقية، جريدة أدبية تحتوي على الكثير من النصوص والخواطر والغرض منها هو إحياء ودعم المواهب المدفون بكل أنواعها، فلكل منا عالم آخر يناسب عقولنا فهو من صنعه بذاته.
رئيس مجلس الإدارة: أسماء ياسر
ليست هناك تعليقات:
إرسال تعليق